حکایت : امریکی صدر - نواں اسکرپٹ -رفعت عباس
امریکی صدر (نواں اسکرپٹ)
ہک امریکی صدر بگھی تے سیل کرن نکھتا ,
اوندی بگھی وچ چار گھوڑے گھنگھلوؤں دے جُتے ہوئے ' اوہ امریکہ توں افریقہ وت یورپ پُجیا ' وت ایشیا تے چھیکڑ وچ آسٹریلیا ' کجھ ڈینہوار اوں چندر تے گزارے۔
اوندے سامان وچ ٹماٹراں دیاں کھیریاں دیاں ٹوکریاں ' مونگ پَھلیاں دے پیکٹ ' جمی ہوئی مچھیاں دے لفافے ' کاسنی پَھلیاں دے اچار دا مرتبان ' افریقہ دے امبیں دا جوس تے آنڈیاں دیاں پَچھیاں ہَن ' افریقہ توں ہک شاعر اوندی بگھی وچ چڑھ آیا ' اوں صدر دے خلاف شاعری کیتی تے زور زور دا کِھلیا ' اوں آکھیا " امریکی صدر کوں ہنڑ واپس امریکہ نی ونجنڑا چاہیدا ' ایں گالھ وچ امریکہ دی چنگائی تے دنیا دا سُکھ اے " صدر اونکوں یونانی ہک جزیرے وچ بگھی توں لہا ڈتا۔
اوں سپین وچ ڈاند بنڑن دی سک کیتی تے لوکیں پِچھوں بھجیا ' اوں لوکیں کوں چا چا کے سٹیا تے کئیاں کوں پھَٹڑ کیتا ' اوں چین وچ انڈا لہاونڑ دی سِک کیتی 'چینیاں اوندے کیتے انڈا لہواونڑ دا سبندھ کیتا ' اوہ بگھی توں لیہ کے چالیہ قدم کُکِڑ وانگوں کرکدا ٹریا ' اوں انڈا لہایا تے ولدا ارام نال بگھی وچ بیہ تھیا ' عرباں ایں بہادری تیں اونکوں تلوار پیش کیتی۔
انڈیا وچ صدر دا سرکاری آدر بھا تھیا ' امریکہ توں چِٹھی آئی " ایہ صدر دا ہک ذاتی دورہ ہے سرکاری آدر بھا دی کوئی لوڑ نی۔
رفعت عباس
#حکایت #rifatabbas #نثر #wowwords #چین #امریکا #سپین
Comments
Post a Comment